TIMOR IHA DALAN BA KRIZI: SAIDA MAK ESKERDA PRESIZA HALO?
Ita Timor iha ne’ebe agora no saida mak eskerda presiza halo? Kondisaun saida mak iha? — partidu eskerda iha Timor sai Mensheviks, no partidu ho naran revolusionariu nafatin hela ho sentru sosial demokrata — krizi sosial atual ne’e hatudu laloran populista no forsa aliansa direta radikal no konservativu buras ke bele loke ordem autoritarian iha postu-demokrasia se karik, forsa sira nee konsege hamonu governasaun atual.
Iha sensu tradisional leninista, ita haree katak, klase politika dominante sira labele unidu ona, labele tama too ba kompromisiu no konsensus entre sira, no nee hatudu katak, krizi ona iha klase ukun-nain sira nia laran. Ita haree ona durante 2020, liuliu fulan rua ikus 2021 neebe nakonu ho sekuensia protestu no kontradisaun sosial naksobu sai.
Ema hamlaha tanba serka sanitaria; mosu inundasaun tanba mudansa klimatika neebe kauza husi kapitalismu; ema mate ba moras no kiak; protesta fatin-fatin, iha Metinaru, Tasi Tolu to’o mai resentimentu publiku atual neebe agora akontese ka konsentra besik hela iha fatin izolamentu Vera Cruz — sira nee hotu signifika katak, povu laiha konfiansa ba governu atual no rejime dominante mos lakon nia konfiansa ba an rasik atu kontinua ukun. Tan ne’e, sira ne’e refleta krizi jeral iha sosiedade nia laran atu ba iha krizi klean.
Dahuluk ita tenki husu, saida mak eskerda atu halo iha tendensia krizi klean no posibilidade ba mosu autoritarian estadismu ne’e?
Ita atu tur nonok, no hein situasaun atu lori ita ba neebe ou lori fila ba normalidade, ou ita presiza organiza-an, junta forsa no halo mobilizasaun politika hodi tradus protestu no tensaun sosial nee sai ba kontradisaun sosial boot neebe mak bele lori ba mudansa radikal? — hela metin no deskuti iha ida-idak nia uma-laran, ou loke-odamatan daudaun ona atu harii aliansa sosial bo’ot ne’ebe laos simples aliansa tatika ka aliansa eleitoral entre movimentu sosial, maibe entre movimentu foun ho baze aliansa entre klase sosial no estrata sosial iha sosiedade ne’e laran hodi mobiliza sekuensia revolusionariu no kontradisaun iha periodu krizi.
Daniel Bensaid nia konvite ba ita atu hanoin-hikas estratejia eskerda, imperativu no importante tebes tanba iha krizi, ita tenki husu kestaun estratejia no laos deit demanda imediatu sira. Iha krizi ne’e hatudu katak, asaun no demanda imediatu ka tatika imediatu mos labele ses husi demanda estratejiku. Tatika hodi serve estratejia, ba harii ejemonia, ba ruptura, ba transformasaun.
Timor atual hatudu krizi iha klase politika dominante nian lao namanas, krizi iha estadu liuliu nia aranjamentu institusional sai buras, kontradisaun klase mos rabenta sai malorek liu tan, sosiedade ne’e iha dekadensia, ita atu luta deit ba aliansa tatiku no kontribui deit nudar forsa estabilizador ba balansu krizi organiku ne’e ka sai deit telespetador non-entusiazmu ida ke ikus ita husik forsa anti-eskerda konservativu sira sae fali ba kaer ukun hanesan esperiensia 2006 hatudu?
Absensia ba vanguarda, no agora saida mak ita tenki halo? — Krizi no protestu sosial tenki tradus no elabora nudar oportunidade ba ita hodi antesipa, prepara no ba hari aliansa sosial bo’ot hodi ba mobiliza, ba ruptura. Tan ne’e, nesesariu duni atu koalia konaba projetu foun ejemonia, no oinsa bloku istoriku foun bele moris iha nee.
Hejemonia, presiza organizor politika nudar motor ba konstrui ne’e, mak sei harii forsa ba ruptura no transformativu duni, harii forsa laos ba rezisti deit maibe kontra-hejemonia, hahu agora. Hejemonia laos ita advokasia ba harii governansia eskerda ou progresivu, maibe oinsa bele revolusioniza estadu. Ejemonia laos konsensus kultural deit, laos deit luta no estratejia klase deit maibe mos ‘sivilizasaun komunismu’ ne’ebe ita hakarak harii ba.
Tan ne’e, kapitalismu, imperialismu no demokrasia kapital iha dekadensia no jornada ba monu. Ita nia demokrasia kapital no sosiedade nee mos iha dalan ba krizi klean. Lisaun ba ita, molok taka — loron 9 Abril 2000, Tony Cliff mate. Marxista-Trotskista nee dehan: ‘fasismu nee movimentu dezesperadu, mas sosialismu ne’e movimentu esperansa’. Mai ita bolu hikas slogan tuan ne’ebe hahu ho Marx no Engels, ke dezenvolve husi Rosa Luxemburg dehan, ‘Sosialismu ou Barbarismu’. Tan ne’e, sem intervensaun eskerda atu luta ba sosialismu agora, maka hakiduk ba fasismu iha Timor nudar posibilidade.
Mai ita enkoraja malu hodi hakuur situasaun atual no luta ba halakon sistema ne’ebe lori ema barak ba sai atan no mizeria.
Kamarada-sira, frenti aliansa sosial, nesesariu!
Sosialismu ou Barbarismu!
Sosialismu ou Fasismu!
Sosialismu mak dalan uniku ba salvasaun!
